10 áhugaverd støð at vitja

Ísland er eitt satt ævintýrland fyri fólk, ið leggja dent á náttúruupplivingar. Ímillum snjóklødd gosfjøll, svartar strendur og brúsandi fossar goyma seg loyndarfullu heitu keldurnar og eitt spennandi djóralív – við hvali og fugli í hópatali. Her er alt í einum – og nakað fyri teg, ið ynskir at uppliva máttmiklu náttúruna tætt hjá.

Á hesi síðu, hava vit savnað nøkur av okkara bestu ferðaviðmæli til mest áhugaverdu upplivilsini í Íslandi – soleiðis at tú kanst fáa íblástur – hvussu tú ferðast, næstu ferð leiðin gongur til Íslands við Norrönu.

Seyðisfjörður

Seyðisfjørður er fyrsta og seinasta uppihaldsstaðið í Íslandi, tá tú ferðast við Norrønu. Her er atløguhavnin hjá Norrønu. Um summarið er eitt blómandi lív á Seyðisfirði – náttúra og mentan renna saman í eina hægri eind – Fleiri kaféir og matstøð mynda lítlu bygdina, ið einans húsar 700 íbúgvum vetrarhálvuna.

Mývatn, Námaskarð & Dettifoss

Mývatn er eitt av hæddarpunktinum í norður Íslandi. Fjølbroytta fuglalívið og fuglasavnið hjá Sigurgeir eru avgjørt eina vitjan verd.

Náttúrubaðið Mývatn liggur eystan fyri bygdina Reykjahlíð. Her kanst tú njóta løtuna í lívgevandi heita kelduvatninum.

Góð ráð: Náttúrubaðið Mývatn verður ofta kallað: “Lítla Bláa Lónið”. Um tú leitar eftir eini serstakari baðuppliving fyri rímiligan prís, viðmæla vit at tú vitjar Náttúrubaðið Mývatn, har tú sleppur undan at stilla teg í bíðirað. Á Námaskarði fært tú ein feril av endaleysu kraftmiklu náttúrufyribrigdunum beint á staðnum – kókandi mórulagdir og gullit svávulskap hvørt um annað – ein ógloymandi sjón.

Hálvan tíma frá Mývatni, liggur navnframi Dettifossur – fossurin er heilt víst eina vitjan verdur – Við eini hædd á 44 m og eini vídd

á heilar 110 m, verður Dettifossur mettur sum ein tann vatnríkasti í øllum Evropa.

Húsavik

Gev havsins djóralívi gætur – tignarligu hvalirnir, ið ferðast kring strendur Íslands gera sær dagliga ein vørr inn á Húsavík. Hetta er ein óførur møguleiki at njóta sjónina av konginum á øllum súgdjórum. Far á hvalasafari og uppliva stórhvalin í sínum rætta
elementi – umframt ríka fuglalívið kring strendurnar.

Um tú hevur ríkiliga tíð, er høvi at royna nýggja Geo Sea, sjóbaði – Ein yngjandi uppliving fyri bæði kropp og sál, meðan eyga verða mettað av føgru náttúruni á staðnum.

Góðafossur er víðagitin – og umboðar serstøku náttúruna í Íslandi – Um ynski er at vitja Góðafoss, tekur tað umleið 30 min. at koyra eystureftir frá Akureyri.

Akureyri

Vitjað næststørsta býin Akureyri, ið liggur beint sunnanfyri pólringin. Á Akureyri er møguligt at síggja stásiligu Akureyra- kirkjuna, ið er sniðgivin í reinum deco-stíli frá 1940 av arkitektinum Guðjon Samuelson. Við sínum 17.000 íbúgvum, er lætt at finna runt í býnum. Býurin hevur bert ta einu handilsgøtuna, ið greinar seg út í nógvar smáar síðugøtur, her kafémentanin og matstøðini eru tað, ið vitjandi og býarbúgvar dagliga gleðast um.

Vesturfirðirnir

Kundi tú hugsa tær at fingið innlit í staðkendar loynidómar ið Vesturfirðirnir goyma?... Hvør fjørður er ein verð fyri seg sjálva og tað kennist, sum um at hvørt fjall er í kapping um uppmerksemi hjá tí vitjandi. Sjálvt minstu partarnir av vesturfirðunum lýsa av vakurleika og vekja eitt forvitni í tilvitinum, ið fær gestsins eyga bara at síggja meir. Vesturfirðirnir er heimstaður Látrabjarg, eitt tað vestasta økið í Evropa, sum hýsir størstu fuglabjørgunum herumleiðir.

Gylti ringurin

Gylti Ringurin, er best umtókta rutan hjá ferðafólki í Íslandi. 300 km langi teinurin, spennir seg frá høvuðstaðnum Reykjavík til suður Íslands og aftur. Tríggir høvuðssteðgir er á vegnum: Tingvøllir, Gullfossur og geotermiska økið Haukadalur, sum er kendast fyri goskeldurnar Geysir og Strokkur.

Reykjavík er høvuðstaður - umframt størsti býurin í Íslandi. Býarøkið er umleið 274 km2 við 200.000 íbúgvum. Býurin hevur mangt og hvat at bjóða býarborgarum og vitjandi – m.a. stásiligu Hallgrímskirkjuna, víðagitnu konserthøllina Hørpuna og heilsustimbrandi Bláa Lónið – ið er uttandura svimjuhylur og gosbað.

Vestmannaoyggjar

Vestmannaoyggjar eru vornar til av upprunagosum, og liggja beint sunnanfyri Ísland. Tær eru 14 oyggjar í tali – har einans Heimaey er búsett av fólki – umleið 4000 íbúgvar í alt. Sum í restini av Íslandi, er øki eitt virkið gosfjallaøkið. Í 20. árhundrað, upplivdu oyggjabúgvarnir tvey stór útbrot. Fyrra útbrotið var í 1963, tá 3 ½ ára langa útbrotið skapti oynna Surtsey. Aðru ferð var, tá gosfjallið Eldfell á Heimaey breyt út í 1973. Henda hending elvdi til, at flestu íbúgvarnir máttu flytast av oynni í skundi. Ferðast til Vestmannaoyggjar, fyri at síggja ørvísi náttúru og fuglalív í mun til restina av Íslandi.

Vík

Vík er sunnasta bygdin í Íslandi og liggur á ringvegnum umleið 180 km frá Reykjavík - einar 2 tímar við bili. Ísland hevur fleiri gosstrendur, men Reynisfjarastrondin, við svarta sandinum – er heilt vist tann mest áhugaverda og víðagitnasta av øllum. Tað er lætt at finna hesa, um ein koyrir á ringvegnum, sum gongur igjøgnum Vík í Mýrdali – Ein gongutúrur á svørtu strondini verður heilt víst viðmæltur.

Tjóðarlundin Skaftafell

Tjóðarlundin Skaftafell varð grundløgd í 1967, men í árinum 2008 gjørdist hon ein partur av størru tjóðarlundini Vatnajøkull. Samlað fevna bæði økini á umleið 14.200 km2 , á henda hátt næststørsta tjóðarlundin í øllum Evropa. Tjóðarlundin Skaftafell liggur við fótin av næststørsta jøkulinum í Íslandi, ið nevnist Vatnajøkul – sum breiðir seg yvir eitt øki á 8.100 km2 og er 1 km djúpur í støðum. Vit viðmæla ein gongutúr til til tann framúr flotta Svartafoss.

Jøkulsárlón

Jøkulsárlón er mest kendi íspollurin í Íslandi. Hesin liggur í landsynningspartinum av ringvegnum, passaliga væl fyri - á hálvari leið millum Tjóðarlundina Skaftafell og Høfn. Jøkulsárlón er fylt við bránaðum ísi frá jøklinum Breiðamerkur, sum er ein partur av Vatnajøkulli – størsti jøkulin í Evropa. Her kanst tú spáka tær ein túr á Diamantstrondini – ella hví ikki royna siglitúrin á jøkulpollinum og uppliva ísfjøllini strúka tætt framvið tær – um hugur tín tráar eftir fleiri ævintýrum, er møguleikin eisini at royna jøkul-útferðirnar.