Hondbóltsferð
til Oslo

ROX

ROX osar av lívi og spæligleði. 1-2-3-4 so byrjar tú at tralla við fótinum, smílast og tú fært hug at fara út á dansigólvið.

ROX leggur seg eftir at spæla gyltar klassikarar, og okkurt nýtt er eisini at hoyra. Stílurin varierar millum country, pop, bleytar balladur, glaðan popp og yvir í rock.

Bólkurin er mannaður av: Signar í Homrum – Sang, John Johansen – Bass, Høgni Fagraberg – Guitar, James Olsen – Trummur og Magni Husgaard – Tangentar.

HARALDSEN

HARALDSEN er ein tann mest spennandi og mest eftirspurdi DJ í Føroyum í løtuni.

Handan HARALDSEN er Beinta Haraldsen, sum bæði skapar ein veitsluróm á einum og hvørjum dansigólvi og hugnaligar tónleikaløtur afturvið einum lekkrum kokkteyli.

HARALDSEN spælir tónleik úr nógvum ymiskum sjangrum, sum tilsamans skapa eitt ljóðlandslag, sum er bæði nostalgiskt og nútímans. HARALDSEN er eisini kend fyri at lata nógvar kendar føroyskar sangir í ein heilt nýggjan ham.

HARALDSEN hevur diskað til eina ørgrynnu av tiltøkum kring landið. Nú fer hon at vera við til at skapa góða stemningin umborð á hondbóltsferðini til Oslo.

Guðrun Sólja & Janus Kampmann

Livandi tónleikur við hjarta og sál – Guðrun Sólja og Janus Kampmann hava í meira enn 15 ár skapt tónleik saman, sum rørir og gleðir.

Við Guðrun Sólju sum sangsolisti og Janus á guitar og kór, bjóða tey eina inniliga og professionella tónleikaupplivingi. Tey hava eitt serligt samanspæl, sum byggir á drúgvar royndir og felags kærleikan til góða tónleikin. Repertoirið er fjølbroytt og verður lagað eftir høvinum og stemninginum – alt frá vøkrum balladum til livandi popptónleik, bæði á enskum og á føroyskum.

Rókur Jákupsson Jakobsen

Rókur er ein drivin og royndur sangari og framførari. Hann hevur framført í meira enn 30 ár, so hann hevur roynt eitt sindur av hvørjum. Longu sum 15 ára gamal byrjaði hann at framføra alment í Føroyum – og tað hevur hann gjørt síðan. Sama um tú ynskir tónleik við futti í, ella tú ert meira til tann róligari tónleikin, so er hann maðurin til uppgávuna.

Rókur er mest kendur sum frontfigurur í fleiri bólkum, men á hesum túri eru tað hann og gittarin, sum eiga pallin.

Hann hevur áður vunnið heitini Ársins sangari og Ársins Singer-Songwriter, og hevur eisini luttikið í kappingum uttanlands við góðum úrslitum.

Ein serlig sjangra, sum Rókur hevur ferðast nógv í, er júst ítróttarsangir. Hann hevur lagt rødd til fleiri av teimum kendastu føroysku ítróttarsangunum, og tá Norrøna er á tremur við ítróttarspentum fólki, koma hesir sangir helst øllum til góðar.

DJ Ottar

Ottar hevur staðið við pultin síðan 1984, tá hann hann byrjaði at diska í Dallas og Klubbanum. Hann hevur síðan tá hildið lív í dansigólvini kring landið – altíð við tí sama endamálinum, at øll skulu hugna sær og hava tað stuttligt.

Við einum breiðum tónleikaúrvali og góðum eyga og oyra fyri stemningi, leggur Ottar seg eftir at fáa øll við – bæði tey, sum vilja dansa, og tey, sum bara vilja njóta tónleikin.

Tú kanst vænta tær alt frá klassiskum hittum til nýggjari dansitónleik – og kanska onkra nostalgiska perlu, tú ikki hevði hoyrt leingi.